Монгол банкны захиалгаар “Тэнхлэг зууч” компани сар бүр “Орон сууцны үнийн индекс”-ийн (ОСҮИ) судалгааг танилцуулдаг уламжлалтай. ОСҮИ өнгөрсөн гуравдугаар сар ямар байсан талаар өнөөдөр танилцууллаа. Судалгаагаар Орон сууцны үнийн индекс 03-р сард суурь үе буюу 2013 оны 1 сараас 17.3 хувийн өсөлттэй гарлаа. Энэ нь өмнөх сараас 0.05 хувь өссөн үзүүлэлт юм. Харин оны эхэн үетэй харьцуулахад -1.35 хувь, өнгөрсөн оны мөн үетэй буюу 12 сарын өмнөхтэй харьцуулахад -6.7 хувиар буурчээ.

Шинэ орон сууцны үнийн индекс суурь үеэс 26.0 хувийн өсөлттэй гарлаа. Энэ нь өмнөх сараас 0.5 хувиар өссөн үзүүлэлт юм. Харин оны эхэн үеэс -0.57 хувиар, өнгөрсөн оны мөн үетэй харьцуулбал -0.44 хувиар буурсан байна.

Хуучин орон сууцны үнийн индекс суурь үеэс 12.9 хувийн өсөлттэй гарлаа. Энэ нь өмнөх сараас -0.06 хувиар, оны эхэн үеэс -2.8, өнгөрсөн оны мөн үеэс -10.1 хувиар буурсан үзүүлэлт юм.
ОСҮИ-ийг Хедоник регрессийн аргаар тооцоолж буй бөгөөд энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин бүх төрлийн 4408 орон сууцны мэдээллийг хамруулсан байна.

Эх сурвалж: Барилга.МН