Монгол Улсад барилгын мэргэжлээр сургуулийг нь төгссөн анхны гэх тодотголтой 23 инженер байдаг. Сайд нарын Зөвлөлийн 1959 оны 103 тоот тогтоолоор МУИС-ийн Физик, математекийн ангийг өөрчилж, 23 оюутантайгаар барилгын инженерийн ангийг байгуулж байв.
Анхны 23 гэдгээрээ салбартаа танигдсан эрхмүүдээс өнөөдөр дөрөв нь энх тунх амьдарч байгаагаас Гончигийн Базар, Отгоны Жадамба, Лувсанцэрэнгийн Мангал нарыг Барилга, хот байгуулалтын сайд Б.Мөнхбаатар хүлээн авч, хүндэтгэл үзүүллээ. Владимир Владимирович Игнатьев нь ОХУ-д энх тунх амьдарч байгаа аж.
Гончигийн Базар нь 1931 онд төрсөн бөгөөд 16 наснаасаа сурган хүмүүжүүлэх мэргэжлээр ажлын гараагаа эхэлж, Монголын ардын армийн офицер, Монгол Улсад төгссөн анхны барилгын инженер болж, сургуульдаа багшаар 40 гаруй жил хойч үеэ сурган хүмүүжүүлэх чиглэлээр ажиллаж байсан Монгол Улсын Ардын багш цолтой эрхэм билээ.
Отгоны Жадамба нь 1935 онд төрсөн. 1956-1961 онд МУИС-ийн Математикийн ба барилгын инженерийн ангид суралцан төгссөн. Иргэн, үйлдвэрийн барилгын анхны инженер юм. Мэргэжлээрээ 30 гаруй жил ажиллаж, Хөдөө аж ахуйн барилгын зургийн институтийн захирал, Дорнод аймгийн Ардын депутатын Хурлын Гүйцэтгэх Захиргааны барилга эрхэлсэн орлогч дарга зэрэг төрийн захиргааны албан тушаал хашиж байсан юм.
Лувсанцэрэнгийн Мангал 1938 онд төрсөн бөгөөд 1961 онд барилгын инженер мэргэжлийг эзэмшиж, Улсын барилгын зургийн төв институтэд инженерээр ажлын гараагаа эхэлж, товчооны дарга, Барилга-Архитектурын комисст хэлтсийн дарга зэрэг 30 гаруй жил мэргэжлээрээ ажиллажээ.
Дашрамд дурьдахад, 1960 онд барилгын салбарт 20 орчим мянган барилгачин жилдээ 2-3 мянган барилга дээр ажиллаж байв. Анхны инженерүүд маань ийнхүү бүтээн байгуулалтын эхэн үетэй учирч эрдэм мэдлэг, ур чадвараа сорих их замаа эхэлсэн байдаг. Анхны 23 инженер, барилгын үйлдвэрлэл, зураг төсөл материал хангамж, эрдэм шинжилгээ, оюутан сургах, удирдлага зэрэг салбарынхаа бүх шатанд ажиллаж дуудах нэртэй дуурсгах бүтээлтэй XX зууныг үдсэн юм.
БХБ-ын сайд Б.Мөнхбаатар барилгын салбарын эдгээр ахмадуудад хойч үедээ үлгэр жишээ болж яваад нь талархал илэрхийлж, эрүүл энх урт удаан наслахыг хүсэн ерөөж, Барилгын салбарын 95 жилийн ойн баярын мэнд хүргэж, дурсгалын зүйл гардууллаа. Уулзалтад уригдсан ахмадууд Б.Мөнхбаатар сайдад талархал илэрхийлж, удирдан чиглүүлж буй хот байгуулалт, газар зохион байгуулалт, барилга, нийтийн аж ахуй, орон сууцны салбарын үйл хэргийг амжилттай авч явааг нь сайшааж, дэмжиж буйгаа илэрхийлж ажлын өндөр амжилт хүсэн ерөөсөн юм.
