"Шинэ бүтээн байгуулалт" хөтөлбөрийн хүрээнд 100 мянган айл орон сууцнаас орлого багатай иргэдэд зургаан хувийн хүүтэй зээл олгох асуудал яригдаж байна. Энэ талаар ЗТБХБЯ-ны харьяа Сургалт судалгаа хөрөнгө оруулалт барилга захиалагчийн албаны дарга Б.Чинтулгаас тодрууллаа.
-Дээрх хөтөлбөрийн хүрээнд арилжааны банкуудад жилийн зургаан хувийн хүүтэй зээл олгох боломж нь бүрдсэн үү?
-Арилжааны банкуудад төр бага хүүтэй хөрөнгийн эх үүсвэрийг бий болгочихвол 6-8 хувийн хүүтэй орон сууцны зээлийг олгож болно. Үүнд төр зохицуулалт хийх нь чухал.
-Ялангуяа орлого багатай иргэдэд жилийн зургаан хувийн хүүтэй зээл олгох тухай яригдаж байна. Энэ нь тэдний амьжиргааны өртөгт таарсан зээлийн хүү болж чадах уу?
-Боломжтой. Бид нар зах зээлийн өнөөгийн хүүг харьцуулан судалсан. Тухайлбал, 60 ам.метр байр авлаа гэхэд өнөөдрийн зах зээлд 900 ам.доллар болно. Харин 30 хувийг нь урьдчилж өгөөд, үлдсэн 70 хувийг нь зээлээр өгвөл одоогийн банкны хүүгээр сард нэлээд мөнгө төлнө. Харин үүнийг зургаан хувь болгочихвол сард 400 мянган төгрөг төлөх юм. Өөрөөр хэлбэл, 2-2.5 дахин хямдарна. Тэрбээр ийн ярилаа.
ДУНДАЖ ОРЛОГОТОЙ ИРГЭДЭЭ ТҮЛХҮҮ ХАМРУУЛАХ ХЭРЭГТЭЙ
Харин Засгийн газар Орон сууц санхүүжилтийн корпорацид "Орон сууцны зээлийн хүүг зургаан хувь хүртэл бууруулах" үүргийг өгсөн. Өөрөөр хэлбэл, 100 мянган айлын орон сууцны хүрээнд зээлийн хүүг зургаан хувь болгох асуудал яригдаж байгаа юм. Одоогоор тус корпорациар дамжуулан олгож буй 4000 айлын орон сууцны зээлийн хүү найман хувьтай байна.
Энэ талаар Орон сууцны санхүүжилтийн корпорацийн зээлийн газрын дарга М.Уламбаяраас тодруулахад "Засгийн газрын тогтоолын дагуу бага орлоготой, орон сууцгүй, анх удаа байртай болж буй иргэдэд зургаан хувийн хүүтэй зээл олгохоор судалж эхэлсэн. Үүний дагуу журмыг боловсруулж, санал болгох түвшинд явж байна. Харин энэ нь "4000 айлын орон сууц төсөлд хамааралгүй гэж ярилаа.
Хүүгийн хэмжээг ийнхүү буулгах нь бага орлоготой, анх удаа байр авах гэж буй иргэдэд таатай мэдээ юм. Гэвч амьдралын түвшнээр нь ялгаварлан зээл олгох нь өрөөсгөл гэдгийг зарим мэргэжилтнүүд хэлж байна.
ШУТИС-ийн эдийн засгийн менежментийн салбарын тэргүүлэх профессор, доктор Б.Энхтуяа "Манайд зээлийн хүүг зургаан хувь болгох боломж бий. Энэ нь нийгэм рүү чиглэсэн үрэлгэн зарлагыг танаж, төрөөс иргэдээ сайхан амьдралд хөтлөх нэг арга юм. Гэхдээ дээрх санаачилгыг илүү үр дүнд хүргэхийн тулд дундаж орлоготой иргэдээ үүнд хамруулах учиртай. Яагаад гэвэл орлого багатай иргэд зургаан хувийн зээлийн хүүг төлөх эсэх нь эрсдэл дагуулж байгаа юм" гэж ярилаа.
Өнөөдрийн байдлаар арилжааны банкуудын орон сууцны зээлийн хүү хамгийн багадаа 15 хувьтай байна. Гэхдээ урьдчилгаа төлбөрөө 70-аас дээш хувиар төлсөн тохиолдолд дээрх хөнгөлөлтийг эдлэнэ. Харин урьдчилгаа төлбөрийн хэмжээ бага байх тусам хүүгийн хэмжээ өсч 18 орчим хувьд хүрч байгаа юм.
Мөн зөвхөн төрийн албан хаагчдад, эсвэл орлого багатай иргэдэд зориулж зээлийн хүүг багасгавал цар хүрээ нь хэтэрхий бага болохыг онцолж байна. АНУ-ын Олон улсын хөгжлийн агентлагийн Үл хөдлөх хөрөнгө, худалдааны шинжээч Ч.Отгонбаяр "Зээл олгох шалгуурт тухайн иргэний орлого баталгаатай эсэхийг нарийн тусгадаг учраас арилжааны банкуудад өрсөлдөх боломж нээгдэж, улмаар зээлийн хүү буурдаг юм. Харин манай Засгийн газраас баримталж буй бодлого, хэрэгжүүлж буй хөтөлбөрийн дагуу зээлийн хүүг хэчнээн бууруулаад ч хамрах хүрээ нь хязгаартай учраас дорвитой үр дүнд хүрэхгүй" гэж ярьсан юм.
Орон сууцны зээлийн хүүг багасгах боломж хэр байгаа талаар Монголын ипотекийн корпорацийн гүйцэтгэх захирал Ц.Энхбаяраас тодруулахад "Арилжааны банкууд жилийн 14 хувийн хүүтэй хадгаламж татаж байгаа тохиолдолд зээлээ үүнээс илүү өндөр хүүгээр өгөхийг бодно. Хэрэв Засгийн газраас зах зээл дээр баталгаатай үнэт цаас гаргаж чадвал 3-4 хувийн хүүтэй санхүүжилт орж ирэх боломжтой. Ингэснээр иргэдийн орон сууцны зээлийн хүү 6-7 хувьд хүрэх юм" гэж ярьлаа.
