Монгол Улсын Засгийн газрын үйл ажиллагааны хөтөлбөрт хэрэгжүүлэхээр тусгагдсан нийгэм, эдийн засгийн чухал ач холбогдол бүхий “Солонго -1, 2 орлогод нийцсэн орон сууцны хороолол барих төсөл”-ийг Бүгд Найрамдах Солонгос Улсын Эдийн засгийн хамтын ажиллагааны хөгжлийн сангийн хөрөнгөөр хэрэгжүүлэхээр шийдвэрлэсэн.
Төслийн суурь бэлтгэл ажил болох зураг төсөл боловсруулах зөвлөх үйлчилгээний гэрээнд Барилга, хот байгуулалтын яамны Төрийн нарийн бичгийн дарга С.Магнайсүрэн болон Солонгосын “САМВҮҮ”, “МҮЁН”, “ДА ГРУПП”, “ЭЛ ЭЙЧ” компаниудын түншлэл цахимаар уулзаж, гарын үсэг зурж гэрээг баталгаажуулсан.
Тэгвэл өнөөдөр /2021.08.20/ БХБЯ-ны Нийтийн аж ахуй, инженерийн дэд бүтцийн бодлогын хэрэгжилтийг зохицуулах газрын дарга Г.Цогтсайхан, Инженер, дэд бүтцийн хэлтсийн дарга Д.Мөнхбаатар, “ТОСК” ТӨХХК-ийн Гүйцэтгэх захирал Л.Батжаргал, “Солонго 1, 2” төслийн зураг төсөл, төсөв боловсруулж буй зургийн компаниудын төлөөлөл болох “Ялгуун баян” ХХК-ийн Холбоо дохиоллын инженер Ц.Жавхлантөгс, “Intellect tower” ХХК-ийн захирал Г.Оюунтунгалаг нар уулзаж, ажлын явц талаар мэдээлэл авах, хоорондын уялдаа холбоог хангах асуудлаар ярилцлаа.
Энэхүү төсөл нь Монгол Улсын Засгийн газраас баримталж буй тэргүүлэх зорилтууд болох иргэдийг орлогод нийцсэн орон сууцаар хангах, агаар, орчны бохирдлыг бууруулах, иргэдийг ая тухтай, эрүүл, аюулгүй орчинд амьдрах нөхцлийг бүрдүүлэх ач холбогдолтой юм.
Төслийн хүрээнд ухаалаг дэвшилтэт технологийг шингээсэн, ногоон хөгжлийн чиг хандлагыг тодорхойлсон, эрчим хүчний хэмнэлттэй 5000 айлын орон сууцны цогц хороолол барихаар ажиллаж байна.
