Барилга, хот байгуулалтын дэд сайд Э.Золбоо Даян дэлхийн ногоон хөгжлийн институтын Ерөнхий захиралын орлогч бөгөөд Ногоон төлөвлөлт, хэрэгжилтийн газрын дарга Хатагтай Хелена Маклеод тэргүүтэй төлөөлөгчдийг 2022 оны 05 дугаар сарын 26 ны өдөр хүлээн авч цаашид хэрэгжүүлэх хамтын ажиллагааны талаар санал солилцлоо.
Уулзалтаар “Улаанбаатар хотын угсармал орон сууцны дулаалгын төсөл”-ийг хамтран үр дүнтэй, төлөвлөсөн хугацаанд хэрэгжүүлэх тал дээр нягт хамтран ажиллах, цаашид энэхүү төслийг орон нутагт өргөжүүлэн хэрэгжүүлэх боломжыг судлан үр дүнг эргэж хэлэлцэхээр тохиролцсон байна.
Дэд сайд Э.Золбоо Даян дэлхийн ногоон хөгжлийн институт байгууллагыг дөнгөж шинээр байгуулагдаад буй Монгол улсын “Ногоон барилгын хүрээлэн”-д гишүүнээр элсэхийг урьж Монгол улсын барилга, хот байгуулалтын салбарт ногоон чиглэлтэй төлөвлөлт, санхүүжилт, хэрэгжүүлэлтийн чиглэлээр хамтран ажиллах санал тавьсныг тус байгууллагын зүгээс талархалтайгаар хүлээн авч хамтран ажиллах хүсэлтэй байгаагаа илэрхийллээ.
Тус хүрээлэн нь ногоон барилгын чиглэлээр үйл ажиллагаа явуулдаг төрийн, төрийн бус байгууллага болон хувийн хэвшлийн төлөөллүүдийг оролцуулан, төр хувийн хэвшлийн түншлэлийн хүрээнд “Ногоон хөгжлийн сэргэлт”-ийг хэрэгжүүлэхэд голлох үүрэгтэй оролцож, хууль эрх зүйн орчныг боловсронгуй болгох, энэ чиглэлийн үйл ажиллагаа эрхэлдэг бизнесс эрхлэгчдэдээ хөнгөлөлттэй санхүүгийн эх үүсвэр олох боломжийг бүрдүүлэхээс гадна томоохон бүтээн байгуулалтын ажлуудыг байгаль орчинд ээлтэй байхаар шийдвэрлэхэд дэмжлэг үзүүлэн ажиллах юм.
