Оюутолгойн хөрөнгө оруулалтын гэрээг үзэглэснээс улбаалан манайд орж ирсэн шууд хөрөнгө оруулалтын үр дүн нь өдгөө сүндэрлэх өндөр байр, орон сууцууд билээ. Манайд орж ирсэн мөнгөн урсгал барилгын салбарыг “онилсон” бөгөөд жилд 20 мянга гаруй орон сууц шинээр ашиглалтад орж байгаа гэсэн тооцоо бий. Сүндэрлэн босох орон сууц, энэ салбарт орсон хөрөнгө оруулалтыг эргүүлдүүлэх талаар ярих эдийн засагчид ч бий. Гэхдээ эхний ээлжинд энэхүү орон сууцнуудыг анхдагч зах зээлд гарган, шинэ байрны түлхүүрийг эздэд нь гардуулах хэрэгтэй. Харин үнэ, ханш хэдий хэмжээнд хэлбэлздэг вэ?
Өдрөөс өдөрт иргэдийн худалдан авах чадвар суларч байгааг батлахын тулд статистик ухах шаардлагагүй. Агуулах чөлөөлөх худалдаа, 50-70 хувийн хямдрал зэрэг мессеж ирэх болсоор нэлээд удаж байна.
Хямдрал зарлаад ч хямралд өртөөд байна гэх байгууллага олширчээ. Энэ байдал ч барил¬гын салбарт нөлөөлж, орон сууцны ам.метрийн үнэ сүүлийн таван cap дараалан унасан байна. Тодруулбал, өнгөрсөн арванхоёрдугаар сард орон сууцны үнийн индексийг арваннэгдүгээр сартай харьцуулахад 0.7 хувиар буурчээ. Гэхдээ үүнийг суурь он буюу 2013 онтой харьцуулахад 18.9 хувиар өссөн байгаа юм. Үнэ өссөн шалтгаан тун энгийн. Шинээр барьж буй барилгын өртөг өссөнтэй холбоотой. Үүнээс гадна нөлөөлөх макро эдийн засгийн үзүүлэлтүүд бий гэдгийг “Тэнхлэг зууч” компанийн судалгааны албанаас мэдээлсэн юм. Тус компанийн хийсэн судалгаанаас харахад Улаанбаатар хотод 2000 оноос хойш барьсан орон сууцны үнэ өнгөрсөн оны эхэнд ам.метр нь дунджаар 2.27 сая байсан бол арванхоёрдугаар сард ам.метр нь дунджаар 2.19 сая төгрөг болж буурчээ.
Харин шинэ орон сууцны ам.метр нь өнгөрсөн оны эхэнд 2.2 сая төгрөг байсан бол оны эцэст 2.15 сая болж буурсан байна. Гэхдээ шинэ орон сууцны ам.метрийн үнэ өнгөрсөн оны дунд үе хүртэл өсөж, гуравдугаар сард 2.28 сая төгрөг болсон боловч есдүгээр сард огцом унаж 2.11 сая төгрөг болжээ. Харин 2000 оноос хойшх хуучин орон сууцны үнэ харьцангуй тогтвортой байсан байна. Энэ нь хуучин байшинг хоёрдогч зах зээлд борлуулдагтай холбоотой юм.
Өнгөрсөн арванхоёрдугаар сарын байдлаар шинэ орон сууцны ам.метрийн дундаж үнийг нийслэлийн долоон дүүргээр ялгаж үзвэл Налайхад хамгийн хямд байгаа аж. Тод¬руулбал, ам метрийг 1.34 сая төгрөгөөр үнэлж байна. Харин Чингэлтэй дүүрэгт шинэ орон сууцны үнэ хамгийн өндөр буюу ам.метр нь 2.98 сая төгрөгтэй тэнцэж байна.
Түүнчлэн, Төвбанкнаас гаргасан судалгааг нарийвчлан үзвэл, шинэ орон сууцны үнийн индекс суурь үеэс 26.8 хувиар өсчээ. Мөн хуучин орон сууцны үнийн индекс суурь үеэс 16.2 хувиар өссөн дүн гарсан байна.
Эх сурвалж: Засгийн газрын мэдээ
