Барилга, хот байгуулалтын салбарын төрийн бодлого, хууль тогтоомжийг биелүүлэх ажлыг зохион байгуулах, орон нутагт төлөөлөн хэрэгжүүлэх тухай хамтын ажиллагааны хүрээнд салбарын сайд Б.Мөнхбаатар аймаг, нийслэлийн Засаг дарга нартай 2021 оны хамтын ажиллагааны гэрээнд гарын үсэг зурж, баталгаажууллаа.
Барилга, хот байгуулалтын салбарын бодлогыг хэрэгжилтийг хангах хүрээнд 2021 онд нийслэл болон аймгийн Засаг дарга нартай байгуулж буй тус гэрээнд Засгийн газрын 2020-2024 оны мөрийн хөтөлбөрт салбарын чиглэлээр тусгагдсан зорилт, арга хэмжээг хэрэгжүүлэх, Зорилтот бүлэг болон залуу гэр бүлийг дэмжих зорилготой орон сууцжуулах төслийг хэрэгжүүлж, эрчимжүүлэх, Ипотекийн зээлийн хүртээмжийг нэмэгдүүлэн орон сууцанд хамрагдах иргэдийн тоог өсгөх, гадаадын зээл, тусламжаар хэрэгжиж байгаа төсөл, хөтөлбөрийг эрчимжүүлэх, ашиглалтад оруулах, Нийслэл, аймгийн төвийн цэвэрлэх байгууламжийг шинэчлэх, инженерийн дэд бүтцийг шинэчлэн засварлах, үерийн усны барилга, байгууламжийг сайжруулахад төрийн захиргааны төв байгууллага болон орон нутгийн захиргааны байгууллага хоорондын харилцаа, ажлын уялдааг сайжруулах чиглэлээр хамтарч ажиллахаар тусгасан байна.
