Иргэдийн дунд нэлээдгүй хүлээлтийг үүсгээд байсан “Буянт-Ухаа 1” хорооллын эхний ээлжийн 567 айлын орон сууц саяхан ашиглалтад орсон. Өчигдөр болсон Ерөнхий сайдын 30 минут уулзалтаар тус хорооллын орон сууцны метр квадратын үнийг 1,280,000 төгрөг байхаар шийдвэрлэснээ нийтэд зарлалаа.
“Буянт-Ухаа 1″ хороололд нийтдээ 1764 айлын орон сууц баригдах бөгөөд үлдсэн орон сууцны барилга энэ оны тавдугаар сард бүрэн ашиглалтанд орох юм. Уг хорооллын орон сууцны 60 хувийг төрийн албан хаагчдад, үлдсэн 40 хувийг ахмад настан, хөгжлийн бэрхшээлтэй болон залуу гэр бүлд олгохоор болжээ. Албаны хүнээс тодруулахад орон сууцны захиалга авахтай холбоотой журам ирэх долоо хоногт шийдвэрлэгдэж гарах тул журам гарсны дараа албан ёсны мэдээлэл өгнө гэлээ.
